មនុស្សខ្មៅ

ខ្ញុំសង្ឃឹមយ៉ាងមុតមាំថាសៀវភៅដែលលោកអ្នកទើបតែបានអានចប់ នឹងផ្ដល់នូវដំណោះស្រាយ និងគំនិតត្រិះរិះពិចារណា ក្នុងផ្លូវល្អជាមួយរឿងមួយចំនួន ដើម្បីជាផលប្រយោជន៍ ឬជាចំណេះដឹងមួយក្នុងនាមបុគ្គលស្រឡាញ់ និងចូលចិត្តអាន គម្បីសិក្សាស្រាវជ្រាវបន្ថែម។ ចំពោះលោកអ្នកដែលមានដំណើរជីវិតស្រដៀង ឬត្រូវរឿងរបស់ខ្លួនត្រង់ចំណុចណា ធាចជាការក្រើនរម្លឹក និងក្លាយជាសារមួយចេកជូនដល់បុគ្គលដទៃទៀត។ ចំណែកអ្នកពុំធ្លាប់បានភ្លក់រសជាតិទាំងនេះ នឹងអាចដឹងថាល្វីងដល់កម្រិតណា ហើយត្រូវប្រឈមមុខជាមួយឧបសគ្គ និងដំណោះស្រាយតាមវិធីបែបណាខ្លះ។

រូបខ្ញុំផ្ទាល់ ពុំមែនជាបុគ្គលដែលអស្ចារ្យ ឬជាអ្នកជោគជ័យអ្វីធំដុំនោះទេ ហើយក៏មិនមែនជាអ្នកចេះដឹងអ្វីជ្រៅជ្រះផងដែរ។ រាល់អត្ថបទនីមួយៗ នៃដំណើរជីវិតរបស់ខ្ញុំដែលបានលើកមកសរសេរ គឺជាបទពិសោធជាក់ស្ដែងពិត បានកើតមានក្នុងសង្គមខ្មែរយើង ហើយវាជាឧទាហរណ៍សាមញ្ញ!ងាយនឹងឈ្វេងយល់បន្ថែម។ លើសពីនេះ គឺខ្ញុំគ្រាន់តែចង់បង្ហាញដល់លោកអ្នកថា “បើមានជីវិតរស់នៅ យើងក៏ត្រូវតែតស៊ូ ជម្នះរាលឧបសគ្គនានា ទោះបីត្រូវដួលជាច្រើនដងយ៉ាងណាក្ដី ក៏មិនត្រូវបោះបង់ ហើយត្រូវតែបន្ដដើរទៅមុខរហូត”។

ជាចុងបញ្ចប់ ខ្ញុំសូមថ្លែងអំណរគុណដល់លោកអ្នកចំពោះការផ្ដល់តម្លៃ ហើយជឿជាក់លើសៀវភៅ១ក្បាលនេះថានឹងបំពេញបាននូវអ្វីដែលលោកអ្នករំពឹងទុក។ សូមឱ្យដំណើរជីវិតទាំងនេះ ក្លាយទៅជាផ្នែកមួយនៃផ្នត់គំនិត និថជាកម្លាំងជំរុញចិត្តដល់លោកអ្នក ដើម្បីជាការចងចាំ ការរក្សាទុក និងការចែករំលែកបន្ដ ជាពិសេសនោះបានរួមចំណែកធ្វើសកម្មភាពជាគំរូល្អ ក្នុងនាមអ្នកអានម្នាក់ដល់ក្មេងៗជំនាន់ក្រោយ។ មានតែការសាមគ្គី ការរួបរួម និងការជួយគ្នាទៅវិញទៅមកទេ ទើបអាចធ្វើឱ្យសង្គមជាតិ មានភាពរីកចម្រើនឆាប់រហ័ស ហើយប្រជាជនរស់ប្រកបដោយក្ដីស្រឡាញ់ សង្ឃឹម ស្នាមញញឹម​និងជឿជាក់។ សូមទេវតា និងវត្ថុស័ក្ដិសិទ្ធិក្នុងលោក ជួយថែរក្សាការពារ ពាំនាំសេចក្ដីសុខឱ្យច្រើនជាងទុក្ខ ហើយជួបតែពុទ្ធិពរទាំង៤ប្រការ គឺអាយុវណ្ណៈ សុខៈ និងពលៈ កុំបីឃ្លៀងឃ្លាតឡើយ។

‍