សំឡេងខ្សឹប

ខ្ញុំក៏លែងហ៊ានវាយតម្លៃអ្នកដទៃផ្ដេសផ្ដាសទៀត ព្រោះបុរេវិនិច្ឆ័យរបស់ខ្ញុំមិនសុទ្ធតែត្រូវនោះទេ។ ជាច្រើនលើកច្រើនសាហើយ ដែលខ្ញុំមានការសោកស្ដាយក្រោយចំពោះការគិតខុសលើគេ ព្រោះនៅពេលស្គាល់គេច្បាស់ ទើបខ្ញុំដឹងថា គេជាមនុស្សល្អ គេមិនមែនដូចអ្វីដែលខ្ញុំធ្លាប់គិត ហើយអ្វីដែលខ្ញុំសោកស្ដាយបំផុតនោះ គឺពេលខ្លះខ្ញុំបានស្គាល់គេច្បាស់ ពេលដែលគេមិនបាននៅទីនេះទៀតឡើយ។
ស្រឡាញ់មនុស្សម្នាក់អាចគ្មានហេតុផល តែស្អប់ត្រូវតែមានហេតុផល ហើយហេតុផលដែលត្រូវស្អប់មនុស្សម្នាក់មិនគួរជាបុរេវិនិច្ឆ័យរបស់យើងចំពោះគេ ទាំងដែលគេមិនមែនដូចអ្វីដែលយើងគិត។ បើគេធ្វើអាក្រក់ ឬមានចរិតដែលយើងមិនចូលចិត្ត យើងស្អប់គេចុះ តែបើវាគ្រាន់តែជាអ្វីដែលយើងគិតស្គាល់ឱ្យច្បាស់សិន ចាំវិនិច្ឆ័យគេតាមក្រោយ ព្រោះការកាត់ក្ដីអ្នកដទៃនៅក្នុងថ្ងៃនេះ អាចធ្វើឱ្យយើងលែងបានស្គាល់ធាតុពិតរបស់គេនៅថ្ងៃក្រោយក៏ថាបាន។