.png)
មេឃជាអ្នកនេសាទរស់នៅលើកោះរ៉ុងសន្លឹម តែគេមានចិត្តធំថ្លើមធំដូចឈ្មោះរបស់គេ។ មេឃហ៊ានប្រឆាំងជាមួយលោកស័ក្ដិវង្សា ប្រធានធនាគារដែលមានទាំងទ្រព្យមានទាំងខ្នងបង្អែក ដោយសារលោកវង្សារកគ្រប់វិធីដេញពួកអ្នកនេសាទឱ្យចេញពីទីកន្លែងដែលគេធ្លាប់រស់នៅ ព្រោះលោកចង់បានដីកោះសាងសង់កាសុីណូ។
មេឃធ្លាប់ពេញចិត្តចន្រ្ទាក្មួយស្រីលោកវង្សា ពេលសង្គ្រោះជីវិតចន្រ្ទាពីក្នុងសមុទ្រ ប៉ុន្ដែជាស្នេហាផ្លេកបន្ទោរ ឃើញភ្លាមស្រឡាញ់ភ្លែត សូម្បីតែមេឃក៏មិនស្គាល់ពីបេះដូងខ្លួនឯងច្បាស់ផង។ ចន្រ្ទាណែនាំប្អូនស្រីជីដូនមួយរបស់នាងឈ្មោះសុរិយាដែលជាកូនស្រីតែមួយរបស់លោកវង្សា ឱ្យមេឃស្គាល់។ ពេលដឹងថាចន្ទ្រា និងសុរិយាជាសាច់ញាតិនឹងគ្នា មេឃទើសទាល់ណាស់ ប៉ុន្ដែគេត្រូវធ្វើតាមគម្រោងការណ៍ដែលគេរៀបចំគឺ ចាប់សុរិយាយកទៅលាក់ទុកលើកោះដើម្បីដាក់លក្ខខណ្ឌជាមួយលោកវង្សា។ ឆ្លងកាត់អនុស្សាវរីយជាច្រើនលើកោះ បែរជាធ្វើឱ្យមេឃ និងសុរិយាពេញចិត្តគ្នាទៅវិញ។
ដំបូងបេះដូងមេឃស្រពេចស្រពិលណាស់មិនដឹងចិត្តខ្លួនឯងឱ្យប្រាកដស្រឡាញ់សុរិយាតែអាណិតចន្ទ្រា ធ្វើឱ្យមេឃបែងចែកមិនដាច់ពីពាក្យថា អាណិត និងស្រឡាញ់។
មេឃ និងសុរិយាបានសាងស្នេហ៍បរិសុទ្ធមួយរាត្រីជាមួយគ្នានៅលើទូកកម្សាន្ដរបស់មេឃ រួចនាងក៏ចាកចេញពីមេឃទៅបន្សល់ទុកតែក្ដីអាឡោះអាល័យ ឱ្យមេឃរស់នៅឯកានិងឈឺផ្សាដួងចិត្ត ព្រោះតែសុរិយាមិនអាចបំផ្លាញទឹកចិត្តពីភពបងប្រុសដ៏ល្អហើយក៏មិនអាចបំផ្លាញបេះដូងមេឃបុរសដឺលនាងស្រឡាញ់។
- ដល់ឆ្នេរអូរឈើទាលហើយ! យើងផុតគ្រោះថ្នាក់ហើយ! សុំទោស! មុននេះខ្ញុំធ្វើព្រោះចាំបាច់ទេ! កុំប្រកាន់នឹងខ្ញុំអី!
មេឃជាមនុស្សចិត្តត្រង់នឹកឃើញត្រង់ណានិយាយត្រង់នោះ មិនចេះរៀបពាក្យរៀបសម្ដីទន់ភ្លន់ផ្អែមល្ហែមអ្វីទេ នាងក្រមុំឱបអាវគេដែលដណ្ដប់លើខ្លួននាងធ្វើមុខអុឹមអៀន៖
- ខ្ញុំត្រូវអរគុណបងប្រុសដែលបានជួយជីវិតខ្ញុំ! មិនមែនត្រូវប្រកាន់ជាមួយបងទេ! អរគុណបងណាស់! មុននេះខ្ញុំស្មានថាខ្ញុំត្រូវស្លាប់នៅក្នុងសមុទ្របាត់ទៅហើយ!
មេឃរាដៃ៖
- មិនអីទេៗ! គុណស្រ័យស្អីប៉ុណ្ណឹងនោះ! អ្នកនាងព្រហើនពេកហើយ! នឹកឃើញយ៉ាងម៉េចជិះអូប័រកាត់សមុទ្រម្នាក់ឯង? សមុទ្រមិនមែនជាកន្លែងសម្រាប់ស្រីៗដើរកម្សាន្ដទេ!
- មកពីខ្ញុំធ្លាប់ឆ្លងទៅលេងលើកោះច្រើនដងដែរ! ចៃដន្យថ្ងៃនេះជួបខ្យល់ជួបភ្លៀងហើយអូប័ររបស់ខ្ញុំក៏ខូចទៀត!
មេឃថយទៅអង្គុយបញ្ឆេះម៉ាសុីនទូកវិញ៖
- ណ្ហើយចុះ! ពេលនេះអ្នកនាងក៏ផុតគ្រោះថ្នាក់ហើយ! ខ្ញុំជូនអ្នកនាងដល់កំពង់អូរឈើទាល! ថ្ងៃក្រោយឈប់ចុះសមុទ្រម្នាក់ឯងទៀត! សំណាងល្អមិនមែនរត់រកអ្នកនាងរហូតទេ!
ស្រស់ស្រីហួសចិត្តនឹងពាក្យសម្ដីរបស់មេឃ មើលទៅគេដូចជាចង់បង្ហាញការយកចិត្តទុកដាក់តែនិយាយចេញមកសោះកក្រោះដូចជាបញ្ជាបន្ដិច សំឡុតបន្ដិចយ៉ាងម៉េចមិនដឹង តែឆោមល្អបែរជាពេញចិត្តនឹងមនុស្សនិយាយត្រង់មិនបត់បែនមិនលាក់កំនួចដូចជាគេទៅវិញ៖
.png)
